Abbyr Shen Reesht - Say That Again 4th August 2024
Abbyr Shen Reesht - Say That Again
Sunday, 4 August 2024 - 33 minutes
Ayns shiartanse dy chlaareyn Radio Vannin er yn chiaghtin va meeryn 'sy Ghaelg ry chlashtyn – well, dy jarroo, ta paart jeh'n Ghaelg ry chlashtyn er Radio Vannin dy mennick as dy reiltagh, agh 'sy phodcast shoh, Abbyr Shen Reesht, ta shin chymsaghey cooidjagh meeryn beggan s'lhiurey.
Ta shin goaill toshiaght lesh meeryn ass Shiaght Laa fastyr Jerdein.
SHIAGHT LAA
Ta shin er chur kione er Yn Chruinnaght Feed Cheead as Kiare as Feed er y gherrid, as son yn eailley shen ta cuirrey currit er sleih dy heet veih cheeraghyn elley dy ghoaill ayrn, liorish cloie kiaull as goaill arrane as daunsin. Cosoyley rish feaillaghyn elley ta goll er cummal, ta'n Chruinnaght beg dy liooar, agh ayns aght shen cur vondeish dooin, dy loayrt rish sleih t'ayns shoh, dy heet dy ve ainjyssagh roo.
Va caa dou loayrt rish paart dy leih v'ayns shoh son yn Chruinnaght, as cheayll shin y voir as inneen v'ayns shoh ass y Vritaan ayns Shiaght Laa y cheayrt s'jerree, Brigitte as Katell Kloareg. Shoh nish tooilley keayrtee da'n eailley.
KIAULL
Ta shin er jeet gys yn traa eddyr daa haghyrt, as ta imbagh noa goaill toshiaght. Jiu, yn chied laa jeh'n vee shoh, she Laa Luanys t'ayn, ny Laa Luanistyn, as ta'n vee shoh enmyssit Mee Luanistyn. T'eh cheet lieh-raad eddyr yn shiass greiney souree, tra ta'n ghrian er jeet gys yn ynnyd syrjey eck 'sy speyr, as va shen yn chied laa as feed Mean Souree, laa va cochianglt rish y jee Manninan Mac Leirr ayns Mannin; as y cormid traa fouyir, tra ta'n oie as yn laa ayn rish yn traa cheddin, lieh as lieh, vees taghyrt mysh yn chied laa as feed Mean Fouyir.
Va mee gra dy nee Mee Luanistyn ta ennym y vee shoh, agh dy jarroo, dy mennick va Gaelgeyryn cheet er ny meeaghyn rere yn imbagh v'ayn, as cheet orroo myr yn chied vee, y nah vee as y trass vee jeh'n imbagh shen. Rere shen, ennym elley t'er Mee Luanistyn – well, ayns aght, cha nee ennym t'urree agh coontey giare j'ee - shen yn chied vee jeh'n ouyir.
Ta'n agglish er n'yannoo laa jeh dy eaillaghey y fouyr vees ry heet. Foddee dy row eh cheet veih cliaghtey shinney paganagh, agh shoh va'n moghrey dy ghoaill yn chied vunney dy churnaght appee as dy vlieh ny grineyn as dy yannoo bwilleen jeh'n troar noa. Row eh cliaghtey paganagh ny dyn, va'n agglish cummal shirveish er-lheh dy vannaghey y willeen shoh, as ayns yn chenn Vaarle haink ennym er shoh, yn hlaf maesse, as shen dy ghra erin y willeen, as haink hlaf maesse 'sy chenn Vaarle dy ve Lammas.
KIAULL
Lhig dooin goll back gys Yn Chruinnaght reesht as feddyn magh mychione tooilley sleih v'ayns shen mleeaney. Cheayll shin daa ven ass yn Helveeish, as haink mee quail daa ven elley va kionefenish, agh haink eh magh dy row ad oayllagh rish daunse Vannin hannah.
JERREY SHIAGHT LAA
Shiaght Laa, cheet er yn Chruinnaght as er Laa Luanys, as she'n chied laa Mee Luanistyn va'n date tra va'n chlaare shen goll er skeayley-magh.
Va Daniel Quayle er-ash reesht veih feailley, aynjee v'eh cloie kegeesh er dy henney, myr shoh ta shin clashtyn eh chebbal y chlaare echey, Kiaull as Cooish, vees goll er jannoo eddyr yn BBC as Radio Vannin fastyr Jeheiney. 'Syn aght cadjin ain 'sy phodcast shoh, she Cooish as Cooish ta shin dy chlashtyn, gyn ny peeshyn dy chiaull, agh shoh dooin Daniel.
KIAULL AS COOISH
Daniel Quayle as y chlaare echey – paart j'ee, ec y chooid sloo, y paart ayn t'eh loayrt - Kiaull as Cooish.
Marish Phil Gawne son Goll as Gaccan fastyr Jedoonee va David Kinley, as ga dy row ad loayrt mychione fockleyn er-lheh as enmyn buill, cha row meer s'lhiurey 'sy Ghaelg er-nyn-son, myr shoh lhig dooin goll er nyn doshiaght gys Claare ny Gael, vees geiyrt dy jeeragh er Goll as Gaccan ec shey pm fastyr beg yn Doonee.
Ayns yn ayrn shoh jeh Dracula liorish Bram Stoker, ta ny cumraagyn loayrt mychione yn aght share dy chur-rish yn Chount Dracula, ta troailt veih Lunnin gys Varna ayns lhong, as eh ny lhie ayns kishtey lane dy ooir ass Transylvania. Ta'n possan dy chaarjyn er n'gholl liorish Traen-tappee y Hiar gys Varna dy uirraghtyn er y lhong, as t'eh foue reaghey dy gholl er-boayrd cho leah's t'ee roshtyn Varna dy stroie y Count. Ta shin clashtyn ayns shoh veih Lioar Laa Jonathan Harker.
CLAARE NY GAEL
Er-lhien nagh bee monney doilleeid ain lesh fir oik ny lesh ny shiaulteyryn. Booise da Jee! shoh yn çheer as aynjee foddee sollaghey laue cooilleeney veg erbee, as ta palçhey argid ain. Cha nel eh orrin agh dy yannoo shickyr nagh vod y lhong çheet stiagh 'sy phurt eddyr yn lhie-ghreiney as irree ny greiney gyn raaue ve currit dooin, as bee mayd sauçhey. Nee'n Briw Poagey Argid reaghey y chooish shoh, er-lhiam!
16 Jerrey Fouyir.—Tuarastyl Mina foast yn red cheddin: tonnyn lhiantyn as ushtey roie, dorraghys as geayaghyn foayroil. S'cronnal eh dy vel shin ayns traa mie, as tra ta shin clashtyn jeh'n Czarina Catherine bee mayd aarloo. Er yn oyr dy vel ee urree goll shaghey ny Dardanelleyn shickyr eh dy bee tuarastyl ennagh ain.
17 Jerrey Fouyir.—Ta dy chooilley red son y chooid smoo reaghit nish, er-lhiam, dy oltaghey y Count tra t'eh çheet back veih'n turrys echey. Dinsh Godalming da'n cholught lhuingys dy row eh sheiltyn foddee dy row y kishtey va currit er-boayrd cummal red ennagh geidit veih carrey da, as hooar eh lieh-choardail dy beagh kied echey fosley eh agh dy beagh y currym ersyn hene. Hug y shellooder pabyr da dy insh da'n Chaptan dy chur da dagh seyrsnys ayns jannoo cre erbee veagh eh geearree er-boayrd y lhong, as kied jeh'n sorçh cheddin neesht da'n jeantagh echey ayns Varna. Ta shin er nakin y jeantagh, ta jannoo mooar jeh ymmyrkey kenjal Godalming rish, as ta shin ooilley shickyr cre erbee oddys eh jannoo dy chooney lesh ny yeearreeyn ain dy bee shen jeant. Ta shin er reaghey hannah ny dy yannoo my vees eh çheet lhien fosley y kishtey. My vees y Count ayns shen, nee Van Helsing as Seward giarrey veih e chione çhelleeragh as seiy kibbin trooid e chree. Nee Morris as Godalming as mish lhiettal cumrail erbee, eer my vees feme ain er jannoo ymmyd jeh ny wappinyn bee aarloo ain. Ta'n Olloo gra my vees shin abyl dy chur-rish corp y Chount myr shoh, dy jean eh dy leah lurg shen tuittym myr joan. Ayns lheid y chooish cha beagh feanish erbee nyn'oi ain, dy beagh ourys jeh dunverys çheet dy ve ayn. Agh eer mannagh row eh, yinnagh shin shassoo ny tuittym trooid yn immeeaght ain, as foddee laa ennagh dy bee'n eer choontey scruit shoh jannoo seose feanish dy heet eddyr kuse jin as tead. Er-my-hon hene, yinnin goaill y caa as slane booise aym my vees eh çheet. T'eh foin gyn faagail mooie immeeaght erbee ayns cooilleeney y chiarail ain. Ta shin er reaghey lesh shiartanse dy ir oik cho leah's ta'n Czarina Catherine cronnit, dy bee fys currit dooin liorish çhaghter er-lheh.
24 Jerrey Fouyir.—Slane shiaghtin dy uirraghtyn. Çhellgrammyn dagh laa son Godalming, agh veg agh yn un skeeal: "Gyn tuarastyl foast." Ta freggyrt Mina fo hypnosis moghrey as fastyr beg gyn caghlaa: tonnyn lhiantyn, ushtey roie, as cruin jeestyrnee.
Çhellgram, Jerrey Fouyir 24oo.
Rufus Smith, Colught Lloyd, Lunnin, gys yn Çhiarn Godalming, trooid H. B. M.
Lhiass-Chonsul, Varna.
"Tuarastyl jeh Czarina Catherine moghrey jiu veih ny Dardanelleyn."
Jeelane yn Er-lhee Seward.
25 Jerrey Fouyir.—Wheesh foddeeaght t'aym son my phonograph! S'boiragh dou screeu jeelane lesh penn; agh ta Van Helsing gra dy vel eh orrym. Va shin ooilley greesit erskyn towse jea tra hooar Godalming y çhellgram echey veih'n cholught Lloyd. *Cha nel fys erbee aym* er shen ta deiney gennaghtyn ayns cah tra ta'n eam dy chaggey ry chlashtyn. She Bnr. Harker va'n un pheiagh 'sy phossan ain, nagh ren cowraghey magh monney erbee dy ennaghtyn. Ny yeih, cha nee quaagh eh nagh ren ee; er y oyr dy ren shin goaill kiarail er-lheh noi lhiggey fys erbee jeh çheet jee. Ayns ny shenn laghyn veagh ee, ta mee shickyr, er chur geill da, dyn y wooise da'n aght veagh shin er chur eab er follaghey eh, agh 'syn aght shoh t'ee caghlaait dy mooar ayns ny three shiaghteeyn t'er n'gholl shaghey. Ta'n liasstid gaase aynjee, as ga dy vel ee jeeaghyn dy ve lajer as ayns slaynt vie, as ta paart jeh'n daah eck çheet urree reesht, cha nel shen dy liooar da Van Helsing as dooys. Ta shin loayrt mychione eck dy mennick; agh cha nel shin er n'ghra fockle rish ny fir elley. Yinnagh eh brishey cree Harker boght—son shickyrys y niart aigney echey—dy beagh fys echey dy row eer ourys ain er y chooish. Ta Van Helsing scrutaghey, myr t'eh ginsh dou, ny feeackleyn eck feer chiarailagh, choud's t'ee ayns stayd fo hypnosis, er y fa t'eh gra choud's nagh vel ad goaill toshiaght er birraghey nagh vel gaue bio jeh caghlaa aynjee. My vees y caghlaa shoh çheet, veagh feme er jannoo red ennagh!... Ta fys ec ny neesht jin er ny veagh feme er jannoo, ga nagh vel shin çheet er y smooinaghtyn ain rish y cheilley. Cha jinnagh yn derrey yeh ny'n jeh elley failleil ayns y churrym—agglagh myr dy beagh eh dy smooinaghtyn er. She fockle feer vie er bastal vees gerjaghey ta "euthanasia"! Ta mee booisal da quoi erbee ren croo eh.
Cha nel eh agh shiaulley mysh 24 oor veih ny Dardanelleyn gys shoh, ec y vieauid ta'n Czarina Catherine er jeet veih Lunnin. S'cosoylagh eh dy jean ee roshtyn traa ennagh 'sy voghrey; agh er yn oyr nagh nee possible eh jee cosney stiagh ayn roish shen, ta shin ooilley er çhee goll dy lhie dy moghey. Nee mayd irree ec nane er y chlag, dy ve aarloo.
25 Jerrey Fouyir, Munlaa.—Gyn naight foast mychione roshtyn y lhong. Va tuarastyl Bnr. Harker fo hypnosis moghrey jiu yn un red myr dy cadjin, myr shoh foddee dy jig naight dooin shallid erbee. Ta shinyn ny deiney ooilley ayns çhiassid dy ghreesaghey, er-lhimmey jeh Harker, ta kiune; ta ny laueyn echey cho feayr as rio, as oor er dy henney hooar mee eh shleeu foyr jeh'n skynn vooar Ghoorka t'eh dy kinjagh gymmyrkey marish. Bee drogh eiyrtys ec y Chount my vees foyr y Chukri shen rieau bentyn rish e scoarnagh, seiyt ec y laue ghroamagh cho feayr as rio!
Va Van Helsing as mish beggan boirit mychione Bnr. Harker jiu. Mysh munlaa haink ee dy ve fo sorçh ennagh dy liasstid nagh mie lesh fer erbee jin. V'ee neu-aashagh car y voghree, myr shoh ec y toshiaght va shin maynrey tra va fys ain dy row ee ny cadley. Agh tra ren e dooinney sheshey çheet er dy neu-chooishagh dy row ee cadley cho trome nagh dod eh doostey ee, hie shin gys y çhamyr eck dy yeeaghyn er-nyn-son hene. V'ee tayrn ennal ayns aght dooghyssagh as v'ee jeeaghyn cho slayntoil as sheeoil dy ren shin coardail dy row yn saveen ny share er-e-son na veg elley. Y ven voght, ta wheesh eck dy yarrood nagh nyrrys eh dy vel cadley, my vees eh cur-lesh neu-chooinaghtyn jee, jannoo foays jee.
Ny s'anmee.—Va'n barel ain prowal dy ve kiart, er yn oyr tra ren ee doostey lurg saveen ooraghey rish kuse dy ooryn, v'ee jeeaghyn dy ve ny s'gennal as ny share na v'ee rish laghyn. Ec yn lhie-ghreiney hug ee y tuarastyl cadjin fo hypnosis. Cre erbee as t'eh er y Vooir Ghoo, ta'n Count siyrraghey da'n chione jurnaa echey. Da'n vaase echey, ta mee treishteil!
[Lhisagh ny fockleyn shoh y ve *Ta fys aym nish*, agh cha ren mee lhaih eh dy kiart!]
JERREY CLAARE NY GAEL
Paart elley jeh chyndaays 'sy Ghaelg jeh Dracula liorish Bram Stoker, as shinyn goll trooid y chyndaays shen shiaghtin er shiaghtin ayns Claare ny Gael.
